Årets fjelltur bør starte i bokhandelen. Der finn du ei lokal bok som kan gje stor inspirasjon til nye turar i nær og fjern ...

Da Jotunheimen fjellsportklubb vart starta av lokale eldsjeler for vel 30 år sia var klatring blant folk flest sett på som tull og nyttelaus tidtrøyte.

Visst hadde vi høyrt om Tenzing og Hill, Næss-ane og Arne Randers Heen, men trudde at slikt var «gudar» forunt og visste lite om at det finst mange som utfordra stupbratte fjellveggar og sylkvasse tindar, merkeleg nok her som det berre er å gå litt utom dørhella. Det gjekk føre seg i det stille, som det høver seg fjellfolk. Boka «Draumen om Gongga Shan» (7.556 m.o.h.) vekte oppsikt, og ljosbileteforedraga etterpå trekte fulle hus for nokre år sia, og fjorårets ekspedisjon til Gurla Mandhata (7.694) vart fylgd med stor interesse.

Nå blir klubbens 30-årsjubileum markert med minst like mange opplevingar, som spenner frå fjerne «uoppnåelege» mål til meir heimlege utfordringar i Jukulkula, Tronoberget og alskens lokale toppar i Jotunheimen, Dovrefjell, Romsdalen og Lofoten.

Regien kunne nok ha vore litt strammare, for å ha unngått gjentakande snakk om matpakker og understell, men alt i alt er dette ei bok som lever opp til tittelen. Det har rett og slett vorte ei eventyrleg bok, og personleg set eg mest pris på innlevingsfulle skildringar frå heimlege fjell!