Det strøymer på med CD’ar i førjulstida, og dei fleste er vinkla inn mot tradisjonar og høgtidshelg. Da er det befriande å kunne setja på ei ekte dølaplåte med klang i målet.

Arild Skar frå Sør-Fron er mann for alle tekster og melodiar på ”Langs Laugen”, 10 utvalde frå 1983 til 2007, og er attpåtil vokalist i alle.

Han har fått god hjelp av produsent og arrangør Pål Erik Jensen, som trakterer ei mengd instrument; gitarar, bass, mandolin og keyboard. Sambygdingane Bent Bredeveien, Svein Ivar Sæther, Tormod Myrvang og Øyvind Skurdal bidreg på piano, trommer og som kor.

I utgangspunktet trudde eg dette var ei hurramegrundtskive som ein vart lei av etter å ha høyrt den ein gong. Da tok eg skammeleg feil. Plåta har surra jamnt og trutt i fleire døgn.

Høyrer du nærare etter på Skar sine kvardagsfunderingar, er det god poesi - ”itte greitt å vera vakje nå om dagen, kår går grensa mellom drøm å fantasi” - og ikkje minst eit verdifullt tiltak for å hegne om ei lita, lokal dialekt. Alt er skreve på fronsmål.

Her er undrande viser i rolege drag, men også rocka drag i beste Åge-stil for ”oss som kom frå småe kår på femtitalet”.

Denne utgjevinga fortener honnør og ein aldri så liten kulturpris.