SKJÅK: Sist torsdag gjekk den fyrste leveransen med turkakjøtt frå familiebedrifta i Skjåk til Afghanistan. Det er i fyrste omgang snakk om eit parti på 600 pakkar. Slår det proteinrike knasket frå Skjåk Tørkekjøtt til blant den internasjonale styrken, kan det fort koma bestillingar som vil overgå det meste i Skjåk Tørkekjøtt sin snart fem år lange historie.

Grønlandsekspedisjon

- Dette er verkeleg moro! Og eit godt teikn på at varene vi produserer har fått eit godt rykte på seg, smiler Leif Skiaker. Tidlegare har bedrifta, som har produksjonslokal i det ombygde fjøset på gardsbruket til familien Skiaker, levert turkakjøtt til mange slags ekspedisjonar. Turkakjøtet frå Skjåk er svært proteinrikt. Det er krydra med salt og andre krydder og er slikt sett godt for å oppretthalde saltbalansen. I tillegg er det knakande godt, om det så er rett frå pakke til munn, eller som tilskot i suppe eller rett i koppen. - Det at det i tillegg er lett i vekt gjer at turkakjøtet kan vera godt brukandes som stridsrasjon. Attendemeldingane frå dei som har prøvd det på harde ekspedisjonar er utruleg positive, fortel Skiaker. Blant anna har Skiaker sitt turkakjøtt vore brukt på Grønlandsekspedisjon. Det er også populært blant jegerar og friluftsfolk flest.

Saltbehov

- Når det nå skal prøvast ut blant den internasjonale styrken i Afghanistan, har det etter det eg forstår samanheng med saltbehov i varmen i kombinasjon med at det er svært næringsrikt. Og at det er godt, seier Skiaker som har levert partiet på 600 pakkar gjennom ei bedrift i Bergen. Han ser at militæret kan bli ei nisje for Skjåk Tørkekjøtt. Men det vil - om omfanget bli stort - setja familiebedrifta i eit dilemma. - For oss kan det vera litt skummelt å binde seg til så store kundar som for eksempel forsvaret. Da står vi straks framfor ei millioninvestering. Men vi skal ikkje forskottere noko som helst. Nå får vi vente og sjå kva det blir til, seier Skiaker.

Problem med råvarer

Han er ofte å sjå på forskjellige salsmesser med turkakjøtt. Der ligg ein vesentleg marknad for Skjåk Tørkekjøtt. Men kjøtet blir også seld i kjedebutikkar. Og ikkje minst på bensinstasjonar. Skiaker trekkjer fram ein bensinstasjon i Østerdalen som eit eksempel der det blir seld mykje turkakjøtt i porsjonspakningar. - Berre denne eine bensinstasjonen sel omtrent fem tusen pakkar med turkakjøtt i året. Det er populært blant mellom andre trailersjåførane. Men at militæret er interessert hadde vi aldri førestilt oss. Det er neppe noko anna produkt med motiv frå Skjåk på som finst att i så mange verdsdelar som vårt. Og potensialet er veldig stort. Men det vanskeleg å vite på kva for line ein skal leggje seg på for framtida. Eit anna spørsmål er tilgangen til råstoff. Vi har framleis problem med å få nok gode nok råvarer. Vi kan stå ved eit vegskilje. Men uansett vil vi nok fortsetja produksjonen. Det spørst i kva for målestokk, seier Leif Skiaker.