LOM/SKJÅK: Jotunheimen MC-klubb fekk sist haust leigd lokale i det som tidlegare var Skjåk Autoservice i Bismo, og etter iherdig dugnadsinnsats passa det bra å få vist fram den nye motorsykkelbasen i samband med helgas store vintertreff.

130 var venta og det kom 120 motorsyklistar frå heile Europa til Krystall-Rally nummer 38 med Fossheim turisthotell som samlingspunkt.

Minst halvparten av dei nytta høvet til å stikke innom dei nye lokala i Bismo, og det var eldsjelene i Skjåk godt nøgde med. Like eins at varaordførar Astrid Gjertsen tok seg tid til å gratulere med blomster, meir skuffa over at ikkje ottadølar flest stakk innom for ein kaffekopp i nyoppussa opphaldsrom på 60 kvadratmeter med kjøkenkrok og bar, 50 kvadratmeter med garasje og lager er det også.

- Flott å ha eit slikt samlingspunkt, seier Åke Persson, sekretæren i svenske Harley Davidson var den einaste med Harley på treffen. Kjørte 1100 kilometer frå Skellefteå om Mora og Røros i minus 34 for å sende direkte ut på nettet frå treffen.

- Brrr, det vart for kaldt. Persson fortel at ein kompis forfraus nakken, ein annan nasen og ein tredje ein finger.

I Mora slo Halla Lindell frå Gotland følgje med BMW Paris Dakar 91-modell med ski som støttehjul. Han har vore på Krystall-Rally 26 gonger sia 1982. Brukar tre og ein halv time med båt før han kan setja seg på sykkelen.

- Alt for Krystall-Rally, seier han, innom for å varme seg i dei nye klubblokala i Bismo.

Utanfor Fossheim i Lom trefte vi på dei tyske brørne Nils og Olaf Graf i ferd med å reparere bensinslangen. Hadde kjørt 1100 kilometer.

Gjennom Tyskland hadde det vore slafsete og dårleg vær, dei treivst langt betre i den iskalde, norske vinteren. I år passa namnet godt. Det vart eit ekte Krystall-Rally.