Heilt utan erfaring med den slags dyr, importerte Sandra og Rolv Kjeka tre alpakkaer for ganske nøyaktig tre år sia.

Nå har tre vorte til fem, og snart blir det sju alpakka på bruket på solsida synst i Skjåk. To går nemleg drektige. Der går dei på beite i lag med sauer og hestar. Dei går godt i lag. Alle har sine spesielle fakter. Alpakkaen er ikkje verre på det enn at dei sender i veg ei spyttklyse som ein ratt kan få rett i fleisen.

Men elles er alpakkaen ein triveleg og vakker skapning. Det mest spesielle med dyret, er ulla. Den blir rekna for å vera blant verda beste ull. Og det var nettopp derfor Sandra og Rolv skaffa seg alpakka. Nå har dei endeleg fått spunne garn frå eigenprodusert alpakkaull.

– Vi har ikkje høyrt om andre som sel garn frå norskprodusert alpakkaull. Så vi er nok dei fyrste i landet, meiner Sandra og Rolv. Dei fekk spunne ulla i Telespinn i Telemark. Store spinneri vil helst ha store mengder. Det er det ikkje snakk om frå produksjonen i Skjåk.

– Vi snakkar om ein nisjeproduksjon. Kvar alpakka gjev mellom to og fire kilo ull i året. Det tek også ganske lang tid å byggje opp ei solid stamme, fortel alpakkaprodusentane på Kjeka og viser fram sokkar og ein vest som er strikka av eige alpakkaull.