I samarbeid med Barne- og likestillingsdepartementet har Regionrådet for Nord-Gudbrandsdalen sett i gang eit prosjekt for å få jenter til å bli buande og flytte til regionen vår. I fjor haust vart det sendt ut ei spørjeundersøking til kommunestyrerepresentantar, Fyrkjefokus-nettverket og lokalt næringsliv i Nord-Gudbrandsdalen. Kvinner og menn fekk spørsmål om utdanning, bustad og arbeidssituasjon. Tidlegare i vår har dei intervjua studentar i Trondheim, Oslo og Bergen. Og nå har dei starta med gruppesamtaler med kvinner i yrkesaktiv alder. - Desse samtalene vil ha mykje å seie for arbeidet vidare. Nå går vi djupare inn i resultata frå spørjeundersøkinga, og får vite meir om bakgrunnen for det dei har svara. Så dette blir spennande å sjå, seier Arnfrid Austin.