I tre veker framover går arkeologar og forskarar manngard på Juvassplatået på leit etter vikingtida. Det har vore oppsiktsvekkjande gode funn dei første dagane.

- Dette er Norges første arkeologiske undersøking på systematisk vis rundt ei snøfonn, og allereie etter eit par dagar kan vi fastslå at det er mange spor etter vikingtida her. Dette er så absolutt banebrytande, fastslår Espen Finstad.

Folk velkomne

Fylkesarkeologen og prosjektleiaren for Klimapark 2469 har sett base i form av eit stort telt på Juvvassfonna for tre veker framover, med håp om at folk flest vil stikke innom for å få litt innsikt i oldtidsfunn og klimautvikling.

Kollega Lars Pilø er feltansvarleg for fem arkeologar og landskapsmålar som er sett til å gå manngard med to meters mellomrom. Oppsiktsvekkjande mange funn i løpet av stutt tid dokumenterer at det har vore jakta rein i uminnelege tider. Som nå trekte reinen høgt til fjells og inn på breane i sommarvarmen. Dette visste jegerane. I vikingtida var det brukt pil og boge, i mellomalderen armbrøst, før geværet gjorde sitt inntog. Arkeologane har funne bevis på alt dette.

GD fikk vera med

GD fekk vera med på funn 116 og 117, attliggjande skræmepinnar mellom og under steinar. Det er også funne geværkuler, men eldste funn er frå 200 etter Kristus, 1800 år gammalt.

Finstad opplyser at det er stor internasjonal interesse for prosjektet. Neste veke kjem fem andre forskarar innan permafrost, meteorologi og glasiologi.

- Vi skal arbeide saman og førebu kilmacampen for ungdom. I fire dagar i midten av august kjem det 40 ungdommar frå Norge, Polen og Canada. Det unike med opplegget, er at det ligg så tett inntil farbar veg, takka vera Nord-Europas høgstliggjande veg til Juvasshytta (1840 m.o.h.), seier Finstad med håp om godt besøk.