Gudbrandsdalsmat og Opplæringskontoret Brimi-Kjøken skal saman med Nasjonalparkriket Reiseliv og Jotunheimen Reiseliv profilere distriktet og ha felles stand under Grüne Woche i Berlin, ei av verdas største forbrukermesser for landbruk, mat og reiseliv med 600.000 besøkjande, 1700 utstillarar og 4000 journalistar.

Landbruks- og matminister Lars Peder Brekk opnar den norske utstillinga den 15. januar.

- Dette er ein viktig arena for oss med tanke på presentasjon og profilering av mat og reiseliv frå Jotunheimen, Rondane og Dovrefjell, Invitasjonen om å få delta på den norske standen gjekk til Gudbrandsdalsmat og Opplæringskontoret Brimi-Kjøken. Vi fann ut at det ville vera viktig å knyte til seg reiselivet for å få til ei samla profilering av reiseliv og matkultur, seier dagleg leiar Anette Svastuen i Gudbrandsdalsmat.

På Gudbrandsdalen sin del av den norske standen kan dei besøkande få treffe Arne Brimi, smake på lokale matprodukt frå Gudbrandsdalen tilstelt av lærlingar frå opplæringskontoret Brimi-Kjøken, av Ståle Johansen, kokk på Fossheim Turisthotell og få informasjon om Pilegrimsleia, turistmål i Gudbrandsdalen og den nye fjellnorgekatalogen.