Rundt hundre personar i og på 41 farkostar av varierande kvalitet og format stod på startstreken ved Raubergstulen laurdag.

Like viktig som å koma raskast ned, var kostymane og sjølva farkosten. Det var litt av kvart som kom susande nedover den bratte vegen. Folk i badekar. Hekser. Bunadsfolk. Og farkostar med både sju og åtte passasjerar på. Seks minutt og tjuetre sekund er den nye fartsrekorden visstnok på.

Det var det fartsfylte rennet som sette prikken over i’en på vinterfestivalen som strekte seg over tre dagar. Dei råaste tok isbad. Dei fantasifulle deltok i kostymerennet. Dei antatt sprekaste deltok hinderløp på truger. Det siste skjedde søndag på Nigardsjordet. Å hoppe over og krype gjennom hinder med truger på beina er lettare sagt enn gjort. Det vart ei publikumsvennleg seanse. Mange driste seg også til å ta ein luftetur over jordet i tyrolertravers.

Frammøtet var så som så. Men dei som på eitt eller anna vis deltok på vinterfestivalen kosa seg på kar. Det skal elles leggjast til at seminaret fredag og festen på Raubergstulen laurdagskvelden samla bra med folk.