Det går forbausande raskt. I løpet av den fyrste arbeidsøkta har dei gjort unna tre av tjuge meter av tunnelen. Ein mann høgg så isen sprett. Dei tre andre fraktar isen ut med snøskuffer. To veker reknar dei med å bruke på oppdraget med tunnelen og rommet innafor.

Guiding

Det er snakk om nybrotsarbeid det som nå skjer i Juvfonna 1840 meter over havet. Istunnelen inngår som det mest spektakulære i Klimapark 2469.

- Vi har som mål å opne for guiding i istunnelen 22. eller 23. juni, seier prosjektleiar og arkeolog Espen Finstad. Det er han som er mannen bak ideen om den fyrste istunnelen i Skandinavia.

Les også: Verdens første klimapark

Utstilling

Inni isen dukkar organisk material som mose fram. Dette kan greitt daterast. Og av det kan ein lese alderen på isen. Det blir på mange måtar ei spesiell oppleving å ta seg inn i tunnelen og katedralen. Den skal ljossettast på ein spesiell måte, og det blir i trinn ein ei mindre utstilling. Det er skulptøren Peder Istad, kjent for sine installasjonar i is, som står for det kunstnariske i istunnelen, opplyser Finstad.

Lett tilgjengeleg

- Det finst istunnelar som er 600 meter lange. Slikt sett blir dette ein miniputtunnel. Det er veldig stor interesse for istunnelar andre plassar, som for eksempel i Alpane. Vi har tru på at denne også blir det, for den er jo spesielt lett tilgjengeleg, seier Finstad. Istunnelen ligg rundt ti minutts gange frå Juvasshytta. Tanken er at tunnelen i neste trinn skal forlengast med 40 meter. Det er ikkje bestemt når neste etappe startar.