- Nå har det gått fire månader sidan flaumen, men det har ikkje kome noko pengar. Folk er frustrerte og fortvila og veit ikkje om dei har råd til sikre heimen sin slik at dei tør å flytte tilbake. Vi les i pressa om at det er folk som må ta opp lån på 140.000 kroner for å dekke eigenandelen som NVE (Norges vassdrags- og energidirektoratet) forlangar. Dette er ein uholdbar situasjon og nå krev vi handling, seier Jan Tore Kamp, leiar i Kvam arbeiderlag.

Tysdag kveld hadde arbeiderlaget møte og nå krev dei oppgjer.

- I tillegg må distriktsandelen på 20 prosent av kostnadene bli borte slik at privatpersonar og kommunar ikkje må stifte meir gjeld for å sikre liv og eigedom. Alt anna er eit klart lyftebrot frå myndigheitenes side, seier Kamp.

- Det skulle ikkje stå på pengar

Han fortel tilbake til dagane etter flaumen da fleire statsrådar kom til Kvam og Otta for å sjå på flaumherjingane. Statsminister Jens Stoltenberg leia an.

- Statsministeren sa at det ikkje skulle stå på pengar. Til nå har vi berre fått tomt prat og byråkratisk snikk-snakk til svar. Det skal lagast ei Stortings-melding til våren. Uholdbart, seier Kamp.

Nå håper han og Kvam arbeiderlag at noko skjer. Og det fort.

- Nødvendig utbetringsarbeid har stoppa opp, sikring blir ikkje gjort og maskinentreprenørar får ikkje oppgjer for utført arbeid, seier Kamp.

Skuffa Sel-ordførar

Da fleire ordførarar frå distriktet var på besøk i Olje- og energidepartementet nyleg fekk dei ei vagt svar. Sel-ordførar Dag Erik Pryhn var skuffa etter møtet.

- Eg forventer at regjeringa tek tak i problematikken med distriktsandelen. Dette er ei utfordring for både kommunar og privatpersonar sidan det er monalege beløp det er snakk om. Vi kan risikere at sikringstiltaka ikkje blir gjennomført og korleis forheld staten seg til det? Det kan umogleg vere lett å forholde seg til, seier Pryhn.

Kva er di meining?