Det kom berre eit einaste spørsmål då Vågå kommunestyre handsama permisjonssøknaden frå Øygard tysdag kveld. Det var Svein Blankenborg frå Bygdalista som ville vite kva formuleringa, «til saka er endeleg avgjort og avslutta» eigentleg betydde om det til dømes vart anke, kva då?

Juridiske råd

Rådmann Tor Arne Gangsø svara at alle formuleringar i denne saka nøye hadde vore drøfta med rådgjevande juristar. Han la likevel til at det var opp til kommunestyret å endre eit vedtak når som helst dei ville det. Etter dette vart det ikkje fleire spørsmål. Det var heilt stilt i salen. Ingen fleire ville ha ordet.

Fungerande ordførar Iselin Jonassen leste så opp permisjonssøknaden frå ordførar Rune Øygard der han grunngjev den med overgrepssaka han er meldt i og der statsadvokaten har teke ut tiltale mot han. Øygard ynskjer samstundes kommunestyret lykke til med dei viktige og interessante utfordringane og moglegheitene for vagværane og Vågåsamfunnet.

Samrøystes

Vedtaket i kommunestyret om å gje permisjon og at Rune Øygard held oppe honoraret han har som ordførar inn til saka er endeleg avgjort og avslutta, vart gjort samrøystes.

I saksutgreiinga frå rådmann Gangsø heiter det at det er kommunestyret som sjølv vedtek reglement for godtgjering for folkevalde, men at denne saka er så unik at det ikkje finst noko formulering i gjeldande reglement som avklarer korleis ein skal handtere godtgjering i samband med permisjon som er grunngjeve ut frå omsynet til kommunen og Vågåsamfunnet.

Det er likevel på det reine, skriv rådmannen, at Øygard etter lova ikkje MÅ søkje permisjon, men at han har gjort det av omsyn til kommunen og Vågåsamfunnet, slik han sjølv gir uttrykk for, skriv rådmannen i si utgreiing, der han og legg til at han ut frå praksis ein kan sjå i politiske organ er det tilrådd at det i slike saker blir innvilga permisjon inntil saka blir nærare avklart.

Ordførar Rune Øygard er tiltalt for utuktig omgang med ei mindreårig jente.

Straffesaka mot han kjem opp i Sør-Gudbrandsdal tingrett 8. oktober 2012.

Han er i dag 100 prosent sjukmeldt.