Laurdag var det eit yrande liv på Øya stadion i Otta. På heile kunstgrasbana vart det sparka fotball og det var lag frå Harpefoss i sør, Lesja i nord og Vågå i vest.

- Til saman er det 67 lag og det betyr opp mot 700 ungar, seier leiar i Otta fotball, Rita Nordfjæren.

Ho fortel at det er ei ære å få arrangere ei slik turnering.

- Ja, det er mykje jobb, men når eg ser alle dei fornøgde ungane er det absolutt verdt det, seier Nordfjæren.

Auke aktiviteten

For fleire av laga er denne cupen starten på fotballsesongen. Bendit Cup har som formål å bidra til ein sunnare livsstil og auka aktivitet hjå dei yngste. Det er ungar mellom 6 - 12 år som deltek på cupen.

- Ungane har det kjempeartig. Samtidig er jo været knall, seier Nordfjæren.